عنوان مطعم فوكاتشاريا محطة الرمل الاسكندرية بجوار أوبرا إسكندرية مسرح سيد درويش

ده الشيف محمد (أحسن واحد يعمل بيتزا فى مصر) 

طباخ مصرى لف العالم بين إيطاليا وأسبانيا وفرنسا ودول ياما 

أكل من ايده نص مشاهير العالم من فنانين ولاعبية كورة وسياسين زى رئيس الإتحاد السوفيتى ميخائيل غورباتشوف وأمير اليابان وغيرهم كتير لما زاروا إيطاليا 

الشيف محمد رجع مصر وفاتح مطعم "فوكاتشاريا" الأسم ده بتاع نوع بيتزا معين فى إيطاليا 

الشيف محمد عنده أحلا بيتزا تدوقها فى مصر 

الشيف محمد بيقدم كواليتى أعلا وبنص التمن بتاع أى براند بيتزا ودى معادلة متحصلش إلا بأيد شيف شاطر 

الشيف محمد عارف ديما هو بيعمل اى لدرجة ان الشارع الى فاتح فيه هو الشارع المجاور لدار الأوبرا فى اسكندرية الى أول سينما رينسانس رويال واخر مطعم "فوكاتشاريا" هو شارع مميز جدا فى مكان مميز فى الاسكندرية 

أى حد دخل الشارع ده عارف ان ليه طعم حتى فى جدرانه وأرضيته المبطله وأما سئلته قالى فتحت هنا عشان ده يشبه شارع Via della Spiga فى مدينة ميلان فى إيطاليا 

الناس الى ملهاش فى البيتزا او متعودة على العك المصرى مش هتقدر تقدر مهارة ونفس الشيف محمد 

صحبتى الى ملهاش فى البيتزا ومش بتحبها حبت بيتزا الشيف محمد ، وصحابى الى عاشوا ولفوا بلاد كتير اتبسطوا من بيتزا الشيف محمد ، حتى الراجل الى رجع من عشر سنين من أيطاليا كان مبهور ببيتزا الشيف محمد وقعد يشكروا ان طول عشر سنين فى مصر محروم من بيتزا حلوة 

الأكل خفيف معمول صح البهارات الإيطالى محلية الكلام الموضوع راقى جدا مش اى حد يقدر البيتزا الى بتتعمل فى فوكاتشاريا إلا لو كان بيتزاجى أو صاحب معدة نضيفة مخربتش من التلوث المصرى 

المكان أسعاره رخصية فيه مكرونات ورز وبيتزات الأسعار من 15 لحد 40 تقريبا ده المتوسط ، البيتزات حجم كبير وتقدر تاخد بالقطعة ، صوت القنوات الإيطالى طالعة من جوا المطعم ، والقعدة فى الشارع وروحه الميلانة بتاعت إيطاليا واحلا جو وأحلا بيتزا 

روحوا هناك وخدو صحابكم وخوضوا تجربة الأكل عند الراجل الى هيبقى براند فى أقل من سنة !

المنيو والأسعار وصورة شارع المطعم واخوه فى إيطاليا كل حاجات فى الصور والمكان الشارع الى جنب مسرح سيد درويش فى إسكندرية الى أوله سينما رينسانس رويال أخره مطعم فوكاتشاريا ومواعيد العمل من 2 م - 11 م ويوم الجمعة إجازة .